THLACAMNAK IH HMUAL

THLACAMNAK IH HMUAL

THUHMAIHRUAI

Thlacamnak kan timi cu Pathian le minung naiawzet le  hmunkhat te ah saduhthah relkhawm le biakawk kha  asi. Thlacamnak hmaan le dik kan timi cu  mah duhnak lawng tlun ih ṭong rero tu si lo, Pathian duhnak khal ngai paih le thlun paih ih thlacam hi thlacamnak hmaan le dik ( True prayer is a dialogue)
cu a si. Cun kan sinak vek cekci in supmi le thuhmi nei lo in Pathian hmaiah cemverver in phuansuah awthluh kha a si. Kannih zumtu pawl ih kan thlarau hrangah le kannunnak hrangah a ṭul bikmi cu thlacamnak hi asi. Jesuh ih zirnak le a nun ah a thupitzia kan hmu thei. (Mtt. 14:23,26: 39, 7: 7-11, 8:1-13.18:19-20.Luk. 23:34, John.17). Kan theih ṭulmi pakhat cu thla kan cam tikah kanmah le kanmah kan biakawk si lo in Pathian kan biak a si ti kan thei a ṭul bikmi  a si. Thlacamnak cu kan nunnak lamtluanah lungawinak le cahnak thazaang in petu  a si. Thlacamnak thu thawn pehpar awin tlawng ka rak kainak ah elawknak tumpi a rak suak dah.  Cumi lai ih ka ṭongmi ka vun mang saal, “ Kei cun voksa khi a thaw zet ti ka thei ko nain ka ei ta lo ahcun ziangvek si a thawtnak ti ka thei ban lo” tin ka rak ṭong dah. Cumi cun ziangsi a sim duh tile thla a cam dah lo pa le nu cun thla cu cam ding a si  a ṭha ti cu an thei ko na in, thlacamnak ih hmual neizia le thiltitheizia an tep (ei) ban lo ruangah zianghman  ah siar lo in thacam an daithlang ṭheu. Thlacamnak ih hmaul neizia le thilti theizia a tep ( ei) ngahzotu cun ziangvek caan khalah thlacamnak thawn an caan an hmang ringring. Kan Bible in thlacamnak ih hmual nei zia le thiltitheizia cu fiangten in sim, tampi sungin malte lawng kan von zoh ding.

NI LE THLAPI AN CAWL (Joshua.10:12-14)

Ramkhat le ramkhat an do awk rero laiah tlangval ṭha Joshua in hitin thla a cam, “Maw Ninu, Gibeon khua tlunah ding law; Maw thlapa, Aijalon Horkuam tlunah cawl law ti ah a rak ti” (Joshua 10:12-14).  Pathian in milai thu a ngai caan leitlun a sersiam thokin a rak um dah lomi  cu tlangval ṭha Joshua ih thlacamnak cu ngai lo in a um thei lo  tariai a si cu, a thlacamnak cu a sang ih a dil vekin Ni le Thlapi cu van tlunah an cawl tariai. Leitlun sersiam thokin a cang dah lomi le a cangtheilo ding tiang thil khal cu thlacamnak cun a cang ter thei a si cu.

PATHIAN IH THINGLUNG A THLENTER(Exo. 32:10-14).

Israel mi pawl in Pathian thin an heng ter. Curuang ah Pathian cu a thin a heng tuk ih Moses hnenah i kham hla aw, himi mi pawl hi ka siatsuah thluh hai ding tiah a ti. Cutikah Moses cun Bawipai hnenah a minung pawl hrangah thinlung kekkuai in thlaza a cam (Exo 32:10-14). Curuangah Bawipa cu a thin a ṭhum sal ih a sim ciami siatsuahnak cu a minung pawl parah thlengter lo in a um. Pathian in ka siatsuah thluh hai ding a timi a ṭongkam le a thinhennak cu thlacamnak in a daiter ih a thinlung a thleng ter thei a si. Pathian thinlung thlengter theitu le thinhennak damter theitu cu thlacamnak lawng a si.

A CINGMINU IN FATE A NEI SAL( ISam, 1:9:20)

Nikhat cu fate a nei thei lomi nunaunu cu thinlung kekkuai le beidong mitthli thawn Pathian hnenah thlaza a cam. Fate ka nei theilo ti thei na cingin Pathian hnenah Bawipa Fapa te in pe aw tiah a dil (ISam 1:20). Cui nunaunu fanei theilo cu minung ruahnak ahcun a cang theilomi a rak si, asinan cui mitthli le thinlung takih a tlacamnak cu Pathian in a ngaisak tariai. Cui nunaunu hnenah Pathian in a dil vekin fapa duhumzet le mawizet cu malsawm a pek saal a si. Minung ruahnak ih cangtheilomi cu thlacamnak cun a cang ter thei a si cu.

MEI IN TI  ADOLH( ISiang 18:36-39)

Karmel Tlang ah profet Elijah in Pathian hnenah thlaza a cam ih, van in mei a rung tlak ciamco, biakṭheng kiang ih sa le ti hmuahhmuah cu a dolh kang thluh (ISiang 18:36-39). A kiang ih ummi mipi pawl cu an mang a bang tuk ih leilung ah an bok thluh, ziangahtile hivek thil cangmi hi ziangtik hmanah an rak hmu dah lo, cun a cangthei ding khal ah an rak zum lo. A si, minung ih ruahbanlo dinhmun tiang thlacamnak cun thil a ti thei a si. 

TUIZAAN THI DINGPA A NUNG SAAL(IISiang. 20:1-6, Isaiah.38:1-10)

Siangpahrang Hezekiah cu a naa ih a thi zikte. Culai fang ah Prophet Isaiah  cu a va feh ih Pathian in a sehherhmi hmuahhmuah tuah thluh seh, a nung lo ding a ti, Curuangah thi dingin tiimlaam aw tiah  a va ti. Cuithu cu Siangpahrang Bawipa in a theih tikah Pathian hnenah a thinlung kekkuai in le mitthli thawn thla a cam, Isaiah cu inntual hman a thleng man hlan ah, Bawipa in va kir saal aw, a thlacamnak le a mitthli ka hmu zo tui hnu kum hleinga a nung saal ding tin va sim saal aw tiah a ti (IISiang 20:1-6, Isaiah 38:1-10). Pathian ṭongkam ih a suak zomi, na thi ding a ti mipa hman, thlacamnak cun a thinlung a thlengter saal ih a thi dingmi pa khal thilo in a nungter sal a si. Aw ….Aw a va mak in a va sunglawi em thlacamnak cu…

THIR CIKCIN AN TLA THLUH (Act. 12:5-11, 16:25, 26)

Peter cu uktu pawl in an kai. Thir cikcin thawn an khit ih  thawng ah an tlak, cun reilo te ah a thu rel ding a si. Cutiih thawng sungih a um laiah Pathian mi zumtu pawl in thlaza an cam sak. Zaankhat cu vancungmi in Perter cu tho aw an ti ih thawnginn leng ah an suah, an khihnak pawl le thawng sangka pakhat hman ong lo riai in thawng leng ah a thleng (Act 12:5-11). A hrangih thla a rak cam rero tu zumtu pawl hnenah a va thleng tikah an mang a bang thluh. Cun Paul le Silas khal cu thawng ah an tlak ve. Thawnginn sung ihsin Pathian  hnenah  lungawi zetin thlaza an cam. Reilo te ahcun Pathian in an thlacamnak a thei, ling a hnin ih thawnginn sangka pawl cu an mah ten an ong aw thluh, cuihleiah thawng thlakmi pawl ih kutkihnak thir cikcin pawl cu zohman ih tham lo in an mah ten an phoih aw thluh (16:25,26). An thlacamnak ruangah thil cang dah kel lomi, sangka ong aw lo ih leng ah suak thei, zohhman ih phoih lo in kutkhihnak cikcin  pawl mah ten poih aw tluh, a vamak ve aw! Thlacamnak cun minung ih ruah ban lo, cangtheilomi  mangbangza thil pawl khal cu a cangter suak thei a si. 

LEITLUN MIROPI PAWL IH THLACAMNUN 

Thlacamnak in thil a ti theizia a thei fiang tu cun thlacam loin an um thei lo. Yongkychoe hi   member 300000 tlun a nei, leitlun ah member tambik neitu a si. Cutikah Pastor pakhat in hitin thu a sut, ziang ruangah saw hi tluk lawmman in member na nei, kei hi zirnak lam khal ah Ph D  ngahmi ka sinan member malte lawng ka nei thei tiah a sut. Younkychoe in ka rual na member hrangah nikhat ah thla voiziat na cam tiah a sut, cupa cun ka cam lem lo  a ti, Kei cu ka member hrangah nikaht ah malbik Nazi 3 thla ka cam a ti. Ka fim ka thiam a ti awtu pastorpa  cu a lung a fim ruairo. Khencik cu an ram uktu pawl in thla na cam nawn a si le $5000 kan lo cawh ding tiah thu an pek. Cutikah Khencik cun a innsang pawl hnenah kan ram uktu pawl hin Pathian hnen ih thlacam hi $5000 man ah an ruat, tu cun nidang ih voi khat kan cammi voi hnih in kan cam ding a ti. Thlacam lo ih um hnak cun $10000 pek ih Pathian hnen thlacam hi sunglawi a ti sawn. Martin Luter in tui ni cu nidang hnakin hnaṭuan ding a tam tuk ruangah nidang ih nazi 1 thla ka cam ṭheumi tuini cu nazi 3 ka cam a ṭul a si a ti. John Knox in an ram Communist ram cu Christian ram cangsuak dingah Lei ro lakah khukbil in thla a cam, a khukbilnak lei ro cu a kuar thei, cun rei hlan ah an ram cu Christian ram ah a rung cang.  Billy Graham  in thlacamnak caan nei lo khawp in hna ṭuan ka nei a si ahcun, rawl ei caan ah ei lo in thla ka cam sawn ding a ti. Rawl ei hnakin thlacam a hrangah a thupi sawn tinak a si cu. Cun leitlun ih mi hminthang tampi in an sim ṭheumi cu, “hih dinhmun in thlentertu cu ka fimnak a si an ti dah lo, ka nu, ka pa, u le nau le zumtu pawl ih tlacamnak a si an ti ṭheu.” Cutin leitlun miropi pawl cun thlacam lo ih um hnak cun an hnaṭuan hmuahhmuah tansan in thlacamnak ih caan hman hi an hril sawn. Ziangruangah thlacam lo in an um thei lo kan ti a si le thlacamnak ih hmual le huham an thei zo ruangah a si.

THUKHAIKHAWMNAK 

Kan Bawipa Jesuh khal in thlacamnak ih thupitzia a mahrori in kan Bible sungah fiangten in zirh a si. Thla kan cam lo pang ding a phang ih a mah rori in thlacamdaan tiang khal in zirh  a si (Mtt. 6:9-15). Amah Jesuh rori in thlacamnak lo cun tiah  a ṭong suak a si. Cutluk in thlacamnak a thupit zia Jesuh amah rori in in sim zo. Leitlun ih minung lam ruahnak ih thil cangtheilo dingmi tiang cang ter thei ih Ni le Thlapi le a thi dingmi tiang nunter saal theitu le cangsuak tertheitu cu thlacamnak a si. A tlun ih kan simcia vekin thlacamnak ih thil cangter suakmi le hmual a neizia kan thei thluh ko ding ti ka zum. Asile nu le pa u le nau, tu cu thlacamnak in thil ziangkim a ti thei ti kan thei zo si khawh, ziangvek in na caan na hmang pei? Maw unau tu ih a cangthei lo ding ti ih na ruahmi le na thinharnak hmuahhmuah khal Pathian hnenah sim aw,  a thi dingmi pa hman thi lo in a nungter saal a si lo maw! Na caan thlacamnak in hmang aw la na ruah ban lomi thil na tlun ah a thleng ding. Thlacamnak cun na nunnak lamtluan lungawinak thawn a lo hruai ding a si. Zumtu ka si ti ih thla a cam dah lotu zumtu cu a thi mi thingkung thawn an bang awk a si tin cangantu in a ti. Maw unau tu ih na beidongnak, a cangtheilo ding ti ih na ruahmi pawl hi Pathian hnenah thlacamnak thawn hlan aw, thlacamnak cun ziangkim a ti thei. Minung ruahnak ih a cangtheilo dingmi pawl khal cang suakter theitu cu thlacamnak lawng a si. Aw zumtu! thlacamnak thawn na caan ṭha hmang ve aw,  nitin ten na neihmi caan ṭha hmuahhmauh cu Pathian hnenah thlacamnak le pawlkomnak in hman zuam awla na ruahnak ih a cangtheilomi thil na tlun ah a cang suak ve ding a si.

Anthony B. LianThang