PATHIAN INNSANG (God's Family)

PATHIAN INNSANG

God’s Family

               INNSANG KAN TIMICU

  Innsang hi Pathian in leitlun a seemsuah laiin hram rakthok mi asi. Pathian in Innsang timi um tengteng dingah a ruatcia mi tla asi fawn. Cui Innsang a um ruangah leithlun ah mipum a karhzai thei ih Pathian ih saduhthah bangin, Amah thangthattu milai tampi kan rak suak theinak hi asi! Ahleice in a nuammi, Pathian lung a tongtu innsang si dingah Pathian hi innsang lubik ah ret in a thuthlun ding hi
asi. Pathian a tihzahtu innsang cu an lung a awi ringring thei,  an bei a dongmai dah lo, an hna a ngam ih an tuahmi kip ah an hlawhtling asi. Innsang thluasuah ngahnak dingah cun innsangpa hi Pathian a duhdawttu le Pathian pakhatnak ih a rettu si atul. Innsang par ah thuneihnak neitu a si bangin rintlakzet le felzet in innsang a humhim thiam a tul asi. Innsangpa ih tuanvo parah innsangnu in taimak suah in a bom veding asi. Innsangnu le innsangpa Pathian lam ah an lung an ret ih pakhat le pakhat duhdaw awzet le ngaithiam awzet in an um asile an innsang cu a hminmen puu “innsang” silo in Pathian ih umpi mi “God’s Family” an si thei ding asi. God’s Family din suak thei nak dingah nun pi dingmi tampi a um ih cumi lak ah malte ka ron relkhawm duh…

 SADUHTHAH NEI HMAISA ATUL

             Innsangnuam pakhat dinsuah hi aol lomi thil a rak si. Mitampi’n innsang nei hi “Thawngtlak” vek in tla an hminsin ti kan hmu theu ko ding. Thungai ahcun cutivek in si ding a si hrimhrim lo! Innsang neitik ah mah duhnak tel lo in sungle khat duhnak men in innsang neiding asilo, saduhtah tumpi thawn innsang dinsuak sawn ding asi. Innsang ih tawan lak thei ding ah an fala, tlangval lai ihsin Pathian thu  thluntu le mifelzet si hmaisa ding asi. An tlanval, falat lai ihsin thok in Pathian hnen ihsin a ra mi a thianghlimmi duhdawtnak thawm hram a bun ih an nun sungah rintlak a si mi le a nuammi innsang dinding ah thinlung nei mi an si tul. Lungrualnak tla  a thupi zet  mi a si. Tathiamnakah, innsangpa lawngin God’s Family a dinsuak duhzet ih innsangnu cun ziangsiarlo in mah duhduh in a rak um men asiahcun innsangpa ih saduhtah cu a kim thei dahlo ding, cuvek thotho in daitlang zet ih a ummi nundaan in innsangnuam a dinsuak thei lo ding. Mino a silai ah Pathian a duhdawt ih, innsangnuam leitlun ah dinsuak a tumtu fala le tlangval an siahcun an pahnih ih saduhthah vek in an dinsuak thei ding asi. Curuangah tumtahnak, saduhtah nei hmaisa lo cun thil hi thutak le khohhnget zet in thil tuahsuak hi a ol lomi thil a rak si. God’s Family dinsuak dingah cun saduhtah lungphurnak nei hmaisa a tul ngaingai.

PATHIAN CU DUHDAWTNAK A SI BANGIN

             “Duhdawtnak” timi tongfangte hi Pathian hnen in a ra mi asi ih cui duhdawtnak sungah ziangtinkim hi a remcang theh(1Kor.13). A thianghlimmi duhdawtnak in mi thinlung a thlengter thei, mithalozet tla mitha zet ah a cang ter thei tu asi. Mitampi cun “Duhdawtnak” tongfang te hi fala le tlangval lai ih a hleice in hmanmi asi ih neiawk hnuahcun a tul nawnlo ti in tla an zum men theu. Khristian innsang cun cuvek ruatnak nei ve ding asi lo. Innsang ih lu Pathian cu “Duhdawtnak” asi bangin, a hruai mi innsang sungah tla duhdawtnak hi tiva bangin luang ringring sawn ding asi. Innsang karlak duhdawtnak hi nikhat hnu nikhat a thlum sinsin sawn ding asi. Duhdawtnak a ummi innsang cu hnisiamsi ten ziangkim a mawi ter in a remter thluh asi. Mah innsang sung lawng siloin kiang le kap pawl tla duhdawt thiam ih cutin a tulmi poh ah titheitawk ten bawm aw ton duhnak thinlung a nei mi innsang cu innsangnuam ansi. Midang thawn rem awzet in an um ih Bawipai’ hrangah tin taimak suahtu innsang cu thluasuah cotu innsang ansi. Duhdawtnak hi lubik asiih cui duhdawtnak nei lawngah remnak a um ding….cui’ remnak nei ding hrang ahcun pakhat le pakhat ngaidam awknak nei ding hi a thupi zet. Cutik lawngah mi tampi’n Pathian ih duhdawtnak sunlawizia kan innsang ciar in an hmu ding ih Pathian an thangthat thei ding a si. 

INNSANG AH PAKHAT LE PAKHAT THEIHTHIAM AWTEN

            Atlun ih simcia vekin “Duhdawtnak” hi innsang ih thawhkehnak asi ih cui’ duhdawtnak tla hi thenhnih ah then theih a si. A thianghlimmi hmual a neimi duhdawtnak cun innsang a fekter thei ih thulolak a simi a hminmen ih duhdawt timi  khawvel duhdawtnak cu a hmun thei lo. Innsang cu Pathian hnenih a ra mi a thianghlimmi duhdawtnak thawn dinsuak a si lawngah a fek dingih rah tha tampi a rah suak thei ding. Ziangahtile duhdawtnak sungah zumawk ngamnak, ngaithiamnak, zawnruatawknak le rinsanawknak pawl a famkim theh asi. Innsang tampi cu an duhdawt awzet cing nan pakhat le pakhat an sualnak le an mawhnak tete an ngaithiam aw theilo in an then aw. Milai kan si cio vek in zokhal a zaten cu famkim thehtu kan si thei lo, cui caan ah kan innsangnu/pa ih theihthiamnak kan ringzet theu. Cutin kan rinmi vek in kan innsangnu/pa in in theihthiam sehla ziangtluk in so kan lung a awi ding….ziangtluk in a thutla kan lung sinsin duh cio ding! Sikhalsehla kan innsangnu/pa in in ngaithiam ringring ko ding ti in cu famkim lonak te kha suah ringring ding cu asi cuanglo. Zokhal mah duhdawtmi innsangpa/nu lungawi ten mah thawn nuamtlang le innsang parah rinumnak/thitsa neizet ih um cu kan duhzet mi asi cio ding. Cutin asi theinak ding hrangah cun ngaithiam awknak le zawnruatawknak kan neih a tul. Innsang neinungzet ih ti thepthep ih tuan-leng thei hmanningla innsang sungah pakhat le pakhat parah thinlung hmuhton awk lonak, thinsau theilonak a um asi ahcun innsang cu a nuam ngaingai thei lo ding. Innsang nu le pa, fate karlak ah an duhnak ciar le an si nak ciar kha thei aw ton ih ngaidamnak thawn kutkai aw in kan feh tlang asi le kan innsang ciar tlunah Pathian a lungawi ter theitu a thluasuah cotu innsang kan si thei cio ding asi.  

INNSANG SUNG TUANVO LAKNAK

            Kan laimi innsang tamsawn hi innsangpa ih ukmi le fehpi mi asi ih innsangnu cu bawmtu an rak si. Tuisan ahcun mipa le nunau hi bangrep in tuan thei, zir thei, thunei thei an siih mipa thawn danglamnak  an nei nawn lo. Cui parah thuruatthiam innsangpa le nu kutkai aw in an ti thei tawk in innsang thansonak ah an tuan asile an saduhthah a kim suak hlohhli ding asi. Sikhalsehla Seemtirnak sungah kan hmu theivek in mipa Adam semsuah hnu lawngah nunau Eve cu amah Adam hrangah bawmtu dingah sersiammi asi. Innsang lu cu Pathian a si ih innsang uktu ding ahcun “Pa” in felzet le rinum zet in hruaikai in innsang“Nu” in a ti theitawk bawm sehla an innsang cu a nuam zetding asi. Innsangpa cu Pathian a tihzah ih innsang zaten biaknak lamah a hruaisuak thei ih rintlakzet mi a si ahcun a innsang cu Pathian hmai le minung hmai ah innsang pitling asi ding.  Kan Bible sungah tla Pathian in innsangpa a thupekmi a thlun a si ahcun a innsang parah thluasuahnak tampi , a tefasin a let let tiangin thluasuah an co ding ti kan hmu thei. Rinsantlak mi innsangpa cun a innsang a humhim thei, a innsangnu tla amah ruangah a lung a awi, a fale pawl tla rintlak pa an nei ruangah mithmaitha an co….an tha a cak ih an pa ih Pathian a duhzia le anmah a kilkhawi thatzia an nun ah cawng duhnak thinlung anei. Cuvek thiamthiam in innsangnu tla innsang khohhnget ding hrangah thuneitu asi ve. Pathian a tihzahtu innsangnu cun a innsang hrangah thluasuah a dil theu. Hnatuan a taimak ih a innsang  thansonak ding hrang thathozet ih a tuantu innsangnu cu innsangpa in tla a lawm ih a fate pawl khal in an lawmpi ve. A sungkhat zaten amah thawngin an lung a awi, an thla a phang dah lo… “Mo tha” ti ih kawhmi a si ih amah tla a nuam aw zet…innsungsang remkhawm tu a si ih Pathian hnenah lungawithu a sim ringring asi  (Thufim 31:10-31). Innsangpa ih duhnak a hawl thiam ih a duhmi tete a lungawi dingah a tuahsak theu. Fate pawl tla hi nu le pa rem aw ten an um tikah an lung an nuam ih innsang parah an thinlung an bun thei. Innsang nu le pa rem awk lo tikah fate pawl inn ah um an duh nawnlo …an thaw a pit theh ih a lengih um men an paih sawn! Cutin mi ropi si duhzet na cing in mithalo, mizuuva tiih kawhmi dinhmun ah an cang theh. Curuangah innsang pakhat ah a tulzetmi cu nu le pa rem aw ten umhi a asi. Innsangpa tla duhduh in mah innsang par ah thunei ding asi lo, Pathian ih daan vek in innsang par ah uk thiam ding asi ih innsangnu khal in innsang hrangah thu ruat thiam a tul. Innsang pakhat din hnuhnu cun cui’ innsang a khohhngetnak dingah le mi ih zohthimtlak Pathian thluasuah a cotu innsang si dingah zuam cio ding asi. Cui thluasuahnak hrampi cu “ innsangpa” a si. Innsangpa in a nupi a duhdawtzet ding ih a nupi khal in a pasal a upat ih a tihzah asile an fate pawl in tla an nu le pa an upat ding asi. Innsangpa Pathian thu a thlun a si ahcun a innsang zate in Pathian mithmai tha an co dingih mi ropi miphun tiih kawhmi an si ding a si. (Saam 128) 

INNSANG NU LE PA KARLAK AH

            Nu le pa hi innsang par ih thuneihtu an si bangin fate pawl nunsim thiam ding a thupizet. Pathian in an tefa pawl lam hmuh dingah le nun sim dingah tuanvo pekmi tla an si. Kan fate cu kan duhdawtzet ….a taksa naa ding kan sianglo ti men in a tul caan hmanah thawi lo ti in tla um men ding asi lo. Kawk tul caan ah kawk ding, funghreu hmang tul caan ah hmang ding, lawm tul caan ah lawm ding an si. A tikcu caan te te ih nun zirh thiam ding hi a tul zet. An nauhak te lai ihsin Pathian an duhdawt theinak ding hrangah thlacamsak, Bible siar pi theu le hlasakpi theu a tul. Biakinn lam ah tla thaten hruaipi an tul, cutik lawngah an thinlung ah Pathian an duh ngaingai ding ih nu le pa tla an upat thiam ding. Cui fate cu nu le pa mithmai tha co ter tu an siding. Nu le pa karlak ah fate hrangah lamzin sialsak thiam tla a tulzet mi asi. Nu le pa hi fate pawl ih cawntlak si ding kan si. Nu le pa hi mah cio ih sungkhat par lawng ah tha ding asi lo….pahnih ih unau sungkhat parah remten le thaten biak aw, bawm aw ding kan si sawn. Khatlam le khatlam lungrual ter tu ding tla kan si. Zoh thim tlak ding mi kan si a tul. Thu poimawh um khalle fate pawl theih ter rero lo in mah pahnih ten remdaan te in rem kawm sal thiam ding asi. Nu le pa pakhat le pakhat ngam aw zet ding ih a tul mi le mah duhdaan te ciar hi thaten le tluangten sim aw ding asi. Ziangvek thuhla a si khalle sim rel aw ngam ringring ding asi…nupa karlak ah thuthup nei ding asi lo. Cui thuthup in thil asi lo mi pipi tiang zumsual pangnak a suah ter thei. Nupa karlak ah zum awknak nei ih nun khawsak tlang asi le ziangvek dinhmun thleng hman seh la an duhdawtnak le an rinsan awknak in nehnak le lungawinak an co ringring thei ding. Innsangpa in innsangnu ih duhnak tete theihsak ih a lungduh vek in innsang a hruaisuak thei a sile ziangtluk in so a innsangnu cu a lungawi ding! Cuvek thiamthiam in innsangnu khal in innsangpa ih duhnak a theihthiam ih nitin ten a duhvek in innsang a kilkhawi thiam a sile ziangtluk in so innsangpa a di a riam ding! Innsungsang ah hin zawnruat awknak in innsang a nuam ter thei…ziangvek mi fel mi pitling kan ti khalle amah zawnte a famkim lonak tete a um theu ih cuih famkim lonak kha nupi/pasal in phensak thiam ding asi….tlinlonak veve kha thei aw ton in mi hmuhniam lonak dingah mah ti thei tawk in a thatnak lam ah hruaipi thiam sawn ding asi. Cutin a sile nupa timi tongfang vekin pahnih lawngah famkim thiammi a si thei ding ih innsang sungah lungnom-hnangamnak a um thei ding asi.   

 

INNSANG AH SIIKAN(DISCIPLINE) NEI DING

           A harhdammi le a thangso mi innsang ah hin innsang ih thlun dingmi discipline nei a tul. Cui discipline cu innsang zaten lungkim mi sikhal a tul. A hleice in fate pawl leng suakcaan tivek tla hi nu le pa in caan tuahsak ding asi. Cui caan luan a si pangle cu lungkim cia vek in discipline ih um vek in tuah a si ding. Innsang pakhat ih discipline cu adang innsang pakhat ih discipline thawn bang aw lo tla a si thei. Sikhalsehla thlun tengteng ding in tuah mi si a tul. Zing tho caan, zan it caan, a leng suak ih inn tlung caan, khawmnak caan, relax caan, cazoh caan le leknak caan tivek tuahsak a tul. Innsang ih tulzet mi pakhat tla cu Innsang Meeting tuah hi asi. Cui meeting cu thlakhat ah voikhat tuah ringring thei sehla a tha ding. Meeting caan ah innsang zaten in caan hmang theih asi ding. Thlakhat sung nu le pa in fate pawl parah an lungkim nak le lungkim lo nak  tivek le duhsaknak tete tla sim fiang ding …fa le khal in nu le pa parah an duhnak le an tulnak simfiang ding asi …a hlan hnak ih thiltha deuh thu an ruatmi pawl tla relkhawm thei ding asi…..nunzirh awknak , pakhat le pakhat tuahsak duhmi tete tla cui meeting ah innsang zaten theih aw theinak dingah simfiang thei siseh la ziangtluk in innsang zaten kan lungrual thei ding! Innsang khawm caan ih nu le pa in fate kawk , nun sim ciamco sehla fate pawl cu khawm tla an paih lemlo men ding….Pathian tla thaten le thutak in an biak thei lo ding ih khawmnak par ah an thinlung an ret thei nawnlo ding hi phang a um nasa! Fate in nu le pa upat daan thiam ding in nu le pa khal in an nuahak lai ihsin Biakinn khal ah hruai ringring ding, nunsim thiam  ding ih an hrangah ah nasazet in thlacam sak ding asi. Innsang hrekkhat ah kan hmutheu mi cu an fate pawl in an nu le pa kha an tihzah ti ding hnak in a tih ih tih tivek asi. Innsungsang ah cuvek in cu si ding a si lo…fate in nu le pa upat ding cu a siko  a sinan tih rori ih tih ding cu  asi lo…a tul caan ah nu le pa le fate cu rualpi vek in  nel aw zet in tla um ding kan si…thinlung sungah nu le pa tihnak , thinlung umvek in sim ngam lo nak le thunuam rel theilo ding in dawnkhamtu um ringring vek ih ruatnak tla cu Khristian innsungsang ah hin um ding asi lo! Nu le pa le fate kutkai aw in …..nu le pa in fate duhdawtnak thawn nunsim tul ah sim ding…lom tul caan ah lawm ding…thazaangpek ding a si ih fate khal in nu le pa upat ih an thusimmi thlun ding a si. Discipline nei ih thlun suak thei tu innsanghi atu ah a thangso mi le hmailam khal ah a thangso ringring dingmi innsang asi . Innsang sung pakhat le pakhat duhnak kan thei aw ih ngaidamnak thawn kan kut kan kai aw thei a si lawngah a nuammi a harhdammi innsangnuam kan din suak thei cio ding asi. 

PATHIAN HNA A TUANTU INNSANG

            Hi leitlun ah Pathian hnathianghlim a tuantu innsang hi ziangtluk in so an mawi! Ziangtluk in so uar an um zia hi! Leitlun caan tawite kan co mi tla hi Pathian ih remruatmi a si bangin Amah ram karhzainak ding hrangah kan tikcu caan, kan innsangte in A hnathiang kan tuan tlang pei. Pathian daan a thlun ih a hrang ih a nungtu innsang cu ziangtik hmanah Pathian in thlusuah lo in a um dah lo. Lamtluan ah a fialmi tuansuak, thehsuak thei ding hi kannih zumtu innsang pawl ih kan seherh bikmi asi. Innsangpa tuannak par ah innsangnu in thazaangpek ih tuamhlawm ding asi….har ah har tlang, nuam ah nuam tlang ding kan si. Kan Kawlram ah Pathian thuthang a phuangtu Judson hman hi caan khatkhat ah Pathian thuphuanhi a cawl men duh theu, cuvek caan ah a innsangnu Ann in thazaang a pek theu ih a lungtho sal dingah  thu a ruat khawmpi theu ti tla kan thei theh ko ding. Milai kan si ih kan duhvek in kan tuan thei lo caan ah kan thazaang a mal theu…thazaang tlungsal thei dingah bawmtu tha kan tul theu…..cutikah kan innsangnu/pa hi kan thathonak kan thazaang hrampi ah an cang theu…nupa cu hnatuannak khal ah pakhat le pakhat  ruatnak tha thazaang petu dingah Pathian ih fialmi kan si. Pathian ih tanpi mi innsang, hnangamnak hrampi a nei tu innsang timi cu Pathian ih ukmi innsang asi . Leitlun ah Pathian fialmi A hnatuan thianghlim kan tuan ruangah mi in in hremhman sehla Josuah in kei le ka innsang cu Pathian hna lawng kan tuan ding a ti vek in kannih zumtu Khristian innsang tla hi kan ti thei tawk in taimak suah in a thei hrih lo tu pawl hnenah thuthangtha kan sim kan phuang cio pei. A harhdammi le a mawimi Khristian innsang kan si theinak dingah kan innsang zaten Pathian kan tihzah ih a thu kan thlun tlang ciopei. 

KAN THU KAN KHAIKHAWM TIKAH

           Leitlun ah innsang dinding kan si ahcun Pathian hmingthatnak a coter thei tu innsangnuam le thluasuah a comi innsang dinsuak ding kan si. Cuih innsang din theinak dingah a hmaisabik ah thlacamnak nasazet nei atul …. Pathian pakhatnak ah ret ding a si….Nu le pa karlak ah tla a fekmi duhdawtnak nei ih zumawknak, ngaidamawknak, zawnruatawknak le bomawtonnak pawl tla nei ding asi. Innsangpa ih hnatuannak innsang uknak ah innsangnu in bomding asi. Ziangvek dinhmun khal ah Pathian fekten an kai hnget asile an innsang cu an thangso ding ih Pathian hmai le minung hmai ah porhtlak innsang an si ding. Innsungsang cu sui le ngun neih tam ruangah lungnuam thei si sawn lo in zianghman nei lo khal ah duhdawtnak le ngaidamawknak neile cui’ innsang cu a nuam taktak mi innsang a si thei ding. Innsang ah pabik “Pathian” a si mi innsang cu innsangnuam asi….Pathian umpi mi innsangcu ziangtluk in so a nuam ding! Lungrualten kut kai aw in feh tlangmi innsang cu mi hmuahhmuah in an lompi mi Pathian innsang ansi tin an phuang ding asi. Pathian a cawimawi tu innsang, pakhat le pakhat ngaidamnak a nei tu innsang cu hi leitlun ah Pathian thluasuah mi innsang an si thei dingih  leitlun nunnak lawng si lo in thlarau nunnak khalah rahtha a rah suak theitu innsang mawi le innsang nuam an si ding. Cui’ innsang cu mi hmuahhmuah ih upatmi le cawn duhmi innsang an si ding asi. Cuvek God’s Family dinsuak theinak dingah Pathian in kan tumtahmi , kan innsang cio parah lamhruai in a hminthatnak ding hrangah thluasuahnak in pe hramseh! Pathian, Jesuh kan innsang uktu Nangmah si kumkhua hram aw…Na innsangnuam din suak theinak dingah kan parah thazaang in pe hram aw!!

Ann B. ZaNuam