SOLOMON HLABU THAWN THAZANG LAKSAL UHSI!

SOLOMON HLABU THAWN THAZANG LAKSAL UHSI!

                                                                      THUHMAIHRUAI

Minungtampi’n Solomon hlabu cu Christian Bible cathianghlim sung ih tel ding ah amawi lo, Fala le Tlangval duhdawtnak thu men asi tin an sim theu. Asinan Solomon hlabu in zumtu pawl ziangtivek in kan um ding ti thu tampi in zirh in in sim asi. Hi hlabu hi Abisagi fala nu le Tuukhal tlangval pa ziangtluk in an duhdawt mi tlun ah an rin um ti thu thawn ngan asi. Himi hlabu hmang in in duhdawttu Bawipa Jesuh khrih hrangah ziangtluk in kan

rinum ve ti hi in ruat ter theu ve asi. Tuini ah zumtu tampi cu zumtu hmin kan pu ko nan, zumtu ih sinak taktak kan thleng ban lo theu. Kan ruat a tul mi cu, tuini ah leitlun nuamnak phunkim le thilthalo tampi sung ih kan tlawn len lai ah ziangtluk in kan biak kan Pathian tlun ah kan rinum in kan thianghlim ti hi ruah a cu thlang asi. Tuini ah kan biak kan Pathian cu a mah tlun ah rinum le thianghlim ding lawng in duhsak tu Pathian asilo, na duhdawtmi, na fala, na tlangval, na innsang pa, na innsang nu, na kawhhran, na miphun le leitlun pi hrangah rinumzet le thianghlim zettu kan si ding in duhsak tu Pathian asi. Solomon hlabu thawn a tanglam vek in thazang laksal uhsi;

1. DUM HMANG NINGNA IANG KA NEI (1:5)

Abisagi cu minung mithmuh ah cun nuthlawi (lengleh), fala thianghlim a rak si nawn lo. Asinan a rak thianghlim zet asi. Abisagi fala nu te cu dumter a rak sinan iang a rak nei mi fala thianghlim te a rak si. Joseph khal cu minung mithmuh ah cun mi nupi sualpi ding in tlaihhrem tu pa a rak si hlei ah, cui thu thawn kum hnih thongah rak thlak mi pa asi. Asinan Joseph cu minung mithmuh ah mi nupi tlaihhrem sualpi tum tin dumter si hman seh la, iang nei zet in, arak sual lo law-law asi, (Sem.39:11-16).  Cuvek in mitampin kan sual lo nacing in sualzet in in hmuh caan tampi khal a um ko ding. Asinan cuvek ih mi in dumzet in in hmuh caan ah kan nih khal in Iang ka nei ve ko tin kan ti thei ve a tul. Mi in dumzet vek in in hmuh caan ah kan mah tu kan rak dum taktak a si ah cun a poizet ding. Kan umnak hmun le ram hi sualnak le Satan ram a sivek in Satan in dumter in tum hman sehla kan nih in Iang nei ding in kan zuam a tul asi. Mi mithmuh ah dum hmang ningna Iang ka nei kan ti thei ve a tul asi.

2. HLINGBUR LAK IH LILI PAR BANG (2:2)

Abisagi cu hlingbur lakah a rak kheu mi fala nute a raksi. David le Solomon hlinglak ah a rak kheu nain a par a rak eeng zet asi. Hling in thil a sun tikah a sunnak ihsin a hrim hmuinak le a rim thaw te a langter asi. Mary Magdalin khal in zihmui Spignard dur cu a rak khuai ih innsung zaten zihmui rim a nam thluh. Gideon le a rualpi pawl in an durkurut siate cu an khuai ih a sung ihsin meifar a lang. Cutik ah an ralpawl an neh. Curuangah mi hnen ih kan tleu suak theinak ding ah kan dur hi kan khuai a tul ve asi. Hling hi kan sinak in santer tu le kan cahnak a rak si sawn, (2Kor 12:7-10; 1Pet 1:7). Hling kan timi cu, ziangvek sualnak le thiltha lo hmun ih kan umnak sung ihsin Jesuh khrih kan zumank, amahvek kansinak kan rim hmuite, a hrang ih kan rinumnak kha suak ter ding tinak asi.

3. NANGMAHTA KA SI IH KATA NA SI VE (2:16)

Abisagi falanu te cu Tuukhal tlangvalpa ih ta asi. Tuukhal tlangvalpa ta ka si ti khal a thei awk ruangah David le Solomon in ziangtin hman an ti thei lo. David le Solomon in voikhat te tal in ka lo duh tin in ti ko aw tin an fial rero hman ah voikhat te hman ka lo duhdawt tin a ti thei lo. Tuini ah nang le kei khal Pathian ta kan si, nangmah le kei mah ta kan silo, man in leimi nang le kei kan si, (1Kor 6:19-20). Tuisunni ah Pathian ta na si nain zota ah si na tuah aw theu? Na pasal ta, na nupi ta, na tlangval ta, na falanu ta  na si sual ve pang maw? Pathian ta si lo in na tlangval na pasal, na fala le na nupi ta na si ah cun a poi zet ding. Jesuh khrih in a ta si ding ah theihthiamnak in tuah zo mi kan si, (2Kor 1:21-22). Jesuh in a mahta si ding in in tuah zo ruangah ka nih khal a mah hrangah kan nun ve a tul asi, (2Kor 5:14-15). Jesuh ta kan sivek in kan nih khal a mahta kan si ve a tul.

4. A ZUUN RIM NGAI IN PAR BANG UAI E (5:8)

A zuun rim ngai in par bang uai e timi cu an mah lawng ruat, anmah lawng mithlam ah cuanter, anmah thu lawng sunzan in ruat le simduhnak thinlung neih kha asi. Cutivek in Jesuh khrih thu lawng hi na ruat in a mah hmuithlam le zirhnak pawl lawng na mitthlam ah na cuanter in a mah thu lawng na ruat in na simrel a tul. Jesuh thuanthu mawite sim le phuan rero hi a nuam in a sunglawi tuk (Khrihstian Hlabu No. 415) hi kan hla a si ding a thupi zet. Cun sunnitlak in Bawipa thangthat hi a nuam (Khrihstian Hlabu No. 340) hi na hla a si ve ding asi. Tuisunni ah Jesuh thuanthu mawite sim rel a kumkhua in ka duh, sunzan in  amah thangthat lawng hi a nuambik ko e tin, kan bawipa Jesuh zuun ngai in kan aui ve a tul.

5. MAWI IN CAK E, KA VALPA CU, THAWNGHRA LAK AH A PIANG HLEICE (5:10)

Abisagi fala nute cun a duhdawtzet mi tuukhal tlangval pa cu a dang tlangval thawnghra le thildang hmuahhmuah hnak in a sangbik le apiangbik ah a ret. Saam 45:2 sung ah cun, mipa hmuahhmuah lak ah mipa mawibik na si a tive. Kan lai thuanthu khal ah, Dardin khal in; “ Tuizan zante hi ziangzan maw asi, puar pempum pathum lawng ril hngai maw, mawi dingdiang val hman um lo in e,” a rak ti ve. Dardin in Pan dingdiang val a timi cu Duh Mang lo cun, a innkhat in tlangval riak hman sehla, a hrangah zankhua dai, cu a rak hartuk in a nuam thei lo tinak asi.

Jesuh cu Ca thianghlim hnak in a tha sawn, (John 5:39).

Gilgal le Bethel hnak in Jesuh a tha sawn, (Amos 5:5).

Duhdawtawk hnak in Jesuh a tha sawn, (Saam 73:25).

Thilpek hnak in Jesuh a tha sawn, (Rome 1:25).

Dinhmun le sinak hnak in Jesuh a tha sawn, (Mr. Paul).

Cuvek in Jesuh tello ih leiltun nun cu a harfualfo ko e. Thil ziangkim hnak in Jesuh a tha sawn.

6. NA KEH LAM KUT IN I TAANGKHAM IH, NA VORHLAM KUT IN KEI I POM (8:3)

Abisagi fala nute in a duhdawtzet mi thukhal tlangval pa hnen ih duhdawtnak a pek hnu ah cun David Siangpahrangpa in a lem thei lo vek in Solomon khal in a lem thei ve lo a si, an mah duh ding in. Cuvek in kan nih khal Jesuh ah kan um ringring ding a sive, amah lo in zianghman kan tuah thei lo ding (John 15:1-8). Ziangtik hman ah Jesuh thawng thenawk hrimrhim ding kan si lo. Jesuh thawn kan then awk ah cun kan cem a si ko. Jesuh ih tangsung in kan suak lo ding a thupi zet. Jesuh hnen ah na keh lam kut in in taangkham ih, na vorhlamkut in kei i pom aw tin kan ti ve atul asi.

7. DUHDAWTNAK CU MIT THEI HLAH EE DAIRIAL TI IN, RUUN TILIAN IN FEN THEI HLAH NGAI (8:7)

 Abisagi falanu te cu leiltun sumle saw thawn an lem rero nan an lem thei lo. An neih mi ram pawl thawn in an lem rero nan an lem thei cuang lo. Midang hnak in sangsawn si ding in an lem rero nan an lem thei cuang lo. Tuukhal pa tlun ih duhdawtnak aneih mi kha thil zianghman in siatsuah le khuhter a duh lo. Paul in, “ ³⁵Cuti a si ahcun zo in so Khrih ih duhdawtnak cun in ṭhen thei ding? Harsatnak siseh, tuarnak siseh, hremnak siseh, riilrawnnak siseh, hnipuan neilo farahnak in siseh, ṭihphannak le thihnak khal siseh, cupawl in in ṭhen thei ding maw? Ṭhen thei hlah! ³⁶Ca Thianghlim sungah, “Nangmah ih ruangah sun nihlawh thahnak kan tong; Thah dingih ruahmi tuu bangtuk kan si,” * tiah a um. ³⁷Hi bangtuk a si ko nain kannih in duhdawtu ih thawngin hi thil hmuahhmuah tlunah kannih cu nehtu hnakin kan uak deuh a si. ³⁸Ziangah tile amah ih in duhdawtnak ihsi cun zianghman in in ṭhensuak thei lo ding, tihi fiangtein ka zum a si; thihnak in siseh, nunnak in siseh, vancungih a ummi vanmi le uktu le huham neitu pawl in siseh, atu san in siseh, hmailam san in siseh, thuneitu ³⁹leitlun ummi in siseh, leihnuai ummi in siseh, sersiammi thil hmuahhmuah in siseh, in ṭhen thei lo ding. Kan Bawipa Khrih Jesuh sungin kan ta a si mi Pathian ih duhdawtnak ihsi cun in ṭhen theitu ding zianghman a um lo,” (Rome 8:35-39). Jesuh duhdawtnak thinlung  aneimi cu thil zianghman in then thei hlah seh ati.

8. KA PAWHTE RALKILNAK LUNGDAWL SANG BANG IN (8:10)

Abisagi falanu te cu minung mithmuh ah cun nuthlawi (lengleh), fala him nawn lo ti ih hmuh  asi nain, a pawhte hman an tham thei lo tinak asi. Ka pawhte cu ralkilnak lungdawl sang vek an si a ti. Zo hman cumi ralkilnak sung, a duhdawtnak le a taksa tlun ah a lut ter hngai lo, zo hman in a duhdawtnak siseh, a taksa siseh an dai thei lo tinak asi. Hivek in kan nih zumtu pawl khal thianghlim ten um ding kan si. In duhdawttu kan Bawipa Jesuh hrangah siseh, kan innsang pa, innsang nu, kan tlangval le kan fala tlun khal ah rinumzet le thianghlim zet te thawn nitin nungding kan si.

THUNETNAK

Tuini ah zumtu nang le kei Solomon hlabu in ziangti vek in kan Bawipa Jesuh hrangah kan rinum in thianghlim ten kan um ding ti thu tampi in zirh. Tuini ah zumtu nang le kei, kan Bawipa Jesuh Khrih hrang  ah rinum le thianghlim zet in kan nun hi a thupi zet. Asinan cumi lawng hi a tawk hrih lo, na leitlunpi hrangah, na ram hrangah, na miphun hrangah, na kawhhran hrangah, na innsang hrangah, na innsanpa hrangah, na innsang nu hrangah, na fala hrangah le na tlangval hrangah, rinumzet le thianghlim zet in nitin te nung ding kan si thu Solomon hlabu in in zirh duh mi asi. Rinumzet le thianghlim zet in nitin te ke a kar theitu kan si theinak ding hrangah PaPathian in thluasuah malza in sawm hram seh.

Anthony B. LianThang